ليلة مع /بقلم الشاعر محمد صلاح حمزة
*! ليلة مع القمر !*
في ليلة م الليالي
والكون ساكت
وهادي
سَـهر معايااااا القمـر
وحكيت له
ع الحكاية
وطال معاه السـهر
حكيت له ع اللي هجر
واستعجل النهاية
لا سامح .. ولا غفر
والقلب كان لسه
لسه في البداية
استعجل هوه ليه ..؟
وازاي هُنا عليه
وليه ما كانش صبر
وكمل الرواية من غير عتاب
ولا هدد بالسفر
وضيع من ايديه حلم لسه بيبتدي
وضيع كمان بايديه عمري وعمره هدر
ودور على الحقيقة وقلبه
عليها قدر
والليل طويل ..طويل
لا بيرحم الحيارى
ولا عيون السهرانين
وقلبه رحايا بيطحن الحجر
العين جافاها النوم
والشوق في قلبي حكم
حكم و أمر
*****
وفضلت مع الليل سهران
سهران وقلبي فيه
حيران
وفتح لي القمر قلبه
أقول له وهو يقوووول
والليل معانا يطووول
يقوللي :
بتحب إيه فيه أكتر ...؟
احب الورد في خدوده
ونظرة عين بتخدر
أحبه لما يتنازل و يتواضع
وأحبه أكتر لما يتكبر
احب نظرة عينيه
ورمشه لما يدبح ملايين
من غير ما يرحم ولا حتى يتأثر
أحب شَـعره
ستاير بلون سواد الليل
على الكتاف
نازلة ب تتغندر
و أحب غصنه لما يتمايل
وقلبي معاه يتحير
أحب في خدوده المرمر
وشفايف من عنبر
وصوته عصافير بتصبح
على الغصون
وبتكبر
***********
و بعد ليله من الف ليله
سـهر معايا القمر
أقووول وهو يقووول
والليل معانا يطووول
هجم النهار علينا
والأمل ...
جوانا انتحر
وصحينا على الحقيقية
وشمس بتجرح عينينا
ودنيا غريبه علينا
لا فيها ليل ولا حبيب ولا قمر
ولا عيون بتعشق السهر
فيها ناس كتير حوالينا
مش حاسه بينا
وقلوبهم من حجر
على الخلق تتجـبر
تنسى حبايبها .. تنسى وتتغير
وناس كتير مش ناس
وبشر مش بشر
أنا ...
قلبي فيهم اتحير
محمد صلاح حمزة
Commentaires
Enregistrer un commentaire