( ترابك وطينك ) // بقلم الشاعر مجدى شاهين
( ترابك و طينك)
أتمرمغ فى ترابك
و آكل من طينك
ولا إني أهاجر و أسيبك
******
أميّل على إخواتى
و أنادي على جيراني
أروح قبلى أو بحرى
زى ما يعجبنى
هنا أو هنا الكل أهلى و أحبابى
مَيَّة شهد و سكر م الزلعة
و اللمة تحلى بأصحابى
مسك وعنبر فى نسمة
تلاعبنا ويا العصارى
حَرِّك ضلة و حياتك
و بَرْدِك جنة أيامى
و ف ليلك تحلى أحلامى
و أتمرمغ ف ترابك
و آكل من طينك
و لا إنى أهاجر و أسيبك
********
أتوضا من ميّة نيلك
و انا ماسك على د يني
و أحبك على إيدك
ترضي عني
و إن مت إفتكريني
على أرضك قاعد
بين الزرعة و كام نخلة
ف أرضك إحضنينى
و أهى كلمة حلوة سامعها
....... أيوووووووووه
الحلوة سمعت
لمت شالها على خدودها
قالت لابوها وخالها لما سألوها
و ماله يامّا من بحرى و بنحبوه
وربابة و ناى و أحلى موال
...... يابوووووووى
وقعت منها الجرة ما هى مكسوفة
طلبها من ناسها و نادوها
لمحوا خجلها و إيديها مرعوشة
فهموا غرضها خطبها وشبكوها
و آدي الفرح كفوف و دفوف
ليها شنة و رنة
و ف الترح دموع و قلوب
فيها رحمة و أنّة
كل دا ألاقيه فين
وليه أحرم منه العين
دا أنا أتمرمغ ف ترابك
و آكل من طينك
و لا إني أهاجر و أسيبك
********
أبو طبلة يدور و يلف
شوارع و حواري
فرحان تلاتين يوم
جاله شهر الصوم تاني
المدفع يضرب و الفانوس ينور
و لافيش نوم الليالي
ياللا تعالى باسمِللَّه ..
يارب إقبل و كفر عنا يا باري
و الليلة عيد ع الدنيا سعيد يا غالي
فين العيدية يا با و يا عمي و يا خالي
كل دا ألاقيه فين
و ليه أحرم منه العين
دا أنا أتمرمغ ف ترابك
و آكل من طينك
و لا إني أهاجر و أسيبك
********
قريبي و قريبك على عرفات
و جارنا بضحيته يزورك و يقولك
بعودة و هنية
و زغرودة حلوة رنت فى بيتنا
نجحت بنت جارتنا
و كمان ابنك ف الثانوية
و جانا الشربات من آخر الحارة هدية
و صاحبي و صاحبك إداله ربي وربك
صبي أو صبية ألف مبروك
يتربى ف عزك
و دق الهون و هز المنخل
و رش ملح و حلويات
إجري يا صاحبي نلحق الواد
إبن فلان و فلانة
طالع شقي
عشانه قامت عركة و خناقة
جريت معايا لاجل نحوش
و تروق الدنيا
سبقونا اللى قلوبهم صافية مصفية
روحنا لاقينا نكتة و ضحكة مدوية
و قفشة ذكية ما فيش كدا ف الدنيا
كل دا ألاقيه فين
و ليه أحرم منه العين
دا انا اتمرمغ ف ترابك
و آكل من طينك
و لا إني أهاجر و أسيبك
*********
أيوة جيبى فاضي لكن راضي
و النومة هنية
و اهو يوم فوق و يوم تحت
و آهي مقضية
صاحبي ناداني ...
يا صاحبي تعالى نتمشى شوية
ع الكورنيش تحكي معايا
و نركب معدية
ياعم اشويلنا الدرة
قال حاضر من عينيا
ياخال شوية ترمس
و اتوصى بينا شوية
ياحلو ياللى ماشى
سلم و ماتقساشي
.. بلاش التقل دا عليا
و انت ماشي
بجنب عينيها بصتلي
و بورد خدودها سحرتني
يا واد انا غالية على ناسي
و مهري غالى
رديت .. ياحلو لاجل ما ترضى عليا
أقدم قلبي و روحي عشانك هدية
قالت ولو ....
سيبك م الحكاية دية و الحركادي
اتشطر و روح لبيت أبويا ف الحارة دية
و خد منه و ادي هاتفرح بيا
كل دا ألاقيه فين
و ليه أحرم منه العين
دا انا أتمرمغ ف ترابك
و آكل من طينك
ولا إني أهاجر و أسيبك
********
صباحكوا قشطة و فل و ياسمين
يا منورين الكراسي يا حلوين
كباية شاي ع الماشي
لاجل عينيا تفتح و توزن راسي
فين الاسطى فلان
يقضيلي الشغلانة دية
أيوة ياباشا ..
أنا محسوبك تؤمر و من عينيا
ياللا بينا ..
وسلام ياصحابي
أشوفكوا المغربية
تسلم إيدك إيه الشطارة دية
و أؤمر طلباتك كام ف الصنعة دية
خللى ياذوق بسيطة
و ما هياش قضية
يابتاع الفاكهة هات من دي و ده
و راعيني شوية
يا مّا .. يا مّا
انتي صاحية و لا نايمة
و مين سأل عليا
خدي يا مّا من رزق ربي ليا
تسلم يابني مجايبك ليا
ولا يحرمنيش عطفك عليا
كل دا ألاقيه فين
و ليه أحرم منه العين
دا أنا أتمرمغ ف ترابك
و آكل من طينك
ولا إني أهاجر و أسيبك
*********
(كلمات : مجدى شاهين )
Commentaires
Enregistrer un commentaire